بعث الفنان تامر حسني رسالة تتضمن نصيحة لجمهوره عبر حسابه الشخصي على موقع التواصل الاجتماعي "فيسبوك"، عن قيمة المثل الأعلى في حياة أي شخص من واقع تجاربه في الحياة.
تضمن منشور تامر حسني كلمات هامة قائلًا: اللي ملوش كبير بيشتري له كبير، مقولة جميلة بس أنا من خلال رحلتي وقد إيه في قوة جبارة الإنسان بيستمدها من اللي بيحبهم بكل جوارحه.. طبعًا كلامي عن النجاح العملي في العمل اللي تحبه.
وتابع تامر حسني: حبيت أقول المقولة بطريقه تانية، وهي اللي ملوش مثل أعلى، يشتري له مثل أعلى، والله والله والله لما بتحب حد ناجح، وتتأثر برحلته أو طريقته ونجاحه، فعلًا بتقدر تبقى زيه وممكن أحسن كمان.. ممكن طبعًا تنجح من غير ما يكون عندك مثل أعلى، بس تركيزك بيبقى أقوى بكتير، مع مثال قدامك حي بيخليك تشوف رحلته قدامك، زي دليل ينورك على خطوات أنت متعرفش نتايجها، بس بتعرفها من خلاله بتشوف تفكيره في التطوير وتفكيره ازاي يتخطى الأزمات وتفكيره في المواكبة لكل مرحلة في حياته إزاي كسر سقف نجاحه، معلش بحب اوصلكم اي حاجه كويسه بتعلمها في حياتي.
وأضاف تامر حسني: اللي ملوش مثل أعلى يشتريله مثل أعلى، يعني يدور ويركز مع حد يحبه ويتعلم منه، ومش شرط في مجاله ممكن تحب حد في مجال تاني، وتحاول تطبق مراحله في مجالك ده، كان كلام من واقع تجربتي، ورأيي الشخصي.. ربنا يوفقكم كلكم وتوصلوا لأبعد من أحلامكم، وتبقوا انتوا كمان مثل أعلى لناس بعدكم.