كشف الفنانة رشا سامي العدل، كواليس الدقائق الأخيرة في حياة شقيقها المخرج الراحل أحمد سامي العدل.
وقالت شقيقة الراحل خلال منشور لها على "فيس بوك": "قاعدين على البحر في دهب في ساعة غروب بنضحك وبنعيط سوا ونشتكي لبعض قد إيه أبونا وحشنا وقد إيه الحياة من غيره صعبة فضفضنا لبعض ووعدنا بعض بحاجات كتير".
وأضاف: "رجع القاهرة على وعد بلقاء قريب نتجمع فيه تاني، وجه اللقاء بعد مكالمة تليفون الحقي أخوكي تعبان في المستشفى جريت عليه لقيت التعب والألم زايدين على عمره عمرين، مش عارف يتنفس وكلامه بصعوبة قعدت أكلمه وأضحكه وأحاول اهون عليه شوية وأسيبه يرتاح شوية".
واستكملت "رشا ": "وفي عز محاولاتي نقله لمستشفى تانية فقد نبض قلبه لثواني قدامي، اتخضيت الدكاترة طمنوني وقالوا مفيش حاجة أهو زي الفل بس قلبي وجعني ولقيتني بقول له عايزاك تسبح وتقول الشهادة معايا، وتفضل تقول كل القرآن اللي انت حافظه".
واختتمت منشورها قائلة: "يا دوبك لفيت ظهري لسة هاخرج أشوف موضوع الإسعاف ونقله لقيت دكاترة وممرضين في كل حتة حوالين أحمد، بيحاولوا ينعشوه 38 دقيقة على الساعة محاولات وأنا واقفة قدامه قلبي بيتقطع وروحي أنا بتطلع مني، ماسكة في خيط أمل من الدخان اتقطع بأخر نفس منه، وراح أحمد، أخويا الصغير الطيب الحنين الهادي".