كشف الفنان أحمد عز العديد من الكواليس والأسرار حول حياته الشخصية وبداية دخوله عالم الفن خلال وجوده ضيفًا في حلقة من بودكاست Big Time مع الإعلامي عمرو أديب.
وتحدث "عز" عن خوفه من المرض بسبب وفاة والدته، وكيف تعاملت والدته مع العلاج بشكل سري، ما أثر عليه وتسبب في تطوير متلازمة الخوف من المرض. ومع ذلك، أعرب عن شكره لنعم الله عليه وأهمية الصحة.
وأضاف: "أمي كانت مدورة البيت عادي كانت بتروح تاخد الكيماوي من غير ما حد يعرف وترجع تطبخ في البيت عادي، وأنا كنت أقرب واحد ليها وقعدت شوفت مراحل دي وبعدها جالي اكتئاب".
وتابع: "بقى عندي متلازمة خوف من المرض، وده بقى طبع عندي ومش هيروح ولكن بتأقلم".
وأشار إلى أنه لا يفهم سبب حب البنات له، وأنه يحاول أن يظل بسيطًا ومتواضعًا في التعامل مع الناس، متابعًا: "بحمد وبشكر ربنا على النعمة الكبيرة اللي أنا فيها، ربنا يكفينا شر المرض دي أكتر حاجة بخاف منها، أنا والله معرفش البنات بتحبني ليه، وحب الناس ده لو دفعت فيه ملايين وطلعت تعيط على السوشيال ميديا وتقول أنا بحبكم وأنا شقيان، مستحيل، أنا أبسط وأخيب في التعامل مما تتخيل".
وأكد أحمد عز أنه لا يحب مشاركة كل أمور حياته اليومية عبر مواقع التواصل الاجتماعي، معقبًا: "حياتي الشخصية متهمش حد، واللي يهم الجمهور أن أعمل فيلم ومسلسل وإعلان كويس، وأنا بزعل جدًا لما بشوف الناس بتقول هي بتاكل وبتشرب وقاعدة فين، في رأيي ده مش صح، والناس لو شافت عيشتي هتزهق".
وأضاف: "أبويا مكنش شايفني هبقى ممثل لأنه كان شغال في البترول وفكر أني هكمل في الكارير ده، وأنا بدأت حياتي كـ ريسبشسنت في قندق موفمبيق الهرم لمدة سنة، وبعدين نقلوني مبيعات، وأنا عندي 25 سنة بقيت مدير مبيعات لمجموعة فنادق بمصر، وسنة 1995 كان مرتبي 7500 جنيه".
وعن بداية مشواره الفني قال: "أول مشهد ليا اتعاد 5 مرات، وكان في ممثلين حواليا وكنت متوتر، وقولت أني عايز أمشي، مهندس الصوت قالي أنا رأيي أنك متشتغلش وأرجع للفنادق تاني".
وختم حديثه: "كنت وحش جدًا ولكن الأستاذ خدني على جنب وقالي أنت هتبقى حاجة بس اصبر".