انفعلت الإعلامية بسمة وهبة في بداية حلقتها من برنامج "90" دقيقة المذاع على قناة المحور، بسبب تصريحات الفنانة مادلين طبر في أحد المواقع الإلكترونية، عن المهرجان القومي للمسرح وتحدث عن الفنان الكبير عادل إمام وطالبت فيها بالإفراج عنه للخروج من منزله.
كما طالبت مادلين طبر باقتحام فيلا الزعيم عادل إمام، الأمر الذي آثار غضب بسمة وهبة.
وقالت "وهبة": "الحقيقة قبل ما ابدأ الحلقة عندي كلمتين مضيقيني ومش هيهدالي بال إلا لما أقولهم، لأن شوفت بوست سيئ وعصبني جدا، للفنانة الأستاذة مادلين طبر، قايلة أمنيتي إن عائلة الزعيم عادل إمام تفرج عنه، ويحضر تكريمه في المهرجان القومي للمسرح، وكنا نستقبله على رموش عينينا، ورامي ابنه مش بيرد خالص، طيب إزاي نطمن عليه، لازم نقتحم الفيلا؟، والناس اللي اقتحموا بيته وعرفوا يعملوا عيد ميلاده برافو عليهم وده المهم".
وعلقت بسمة وهبة قائلة: " الحقيقة ده بوست صادم جدا تستقبليه ليه وأنتي تعرفيه منين، يحضر المهرجان أو ميحضرش أنتي إيه دخلك، يعني إيه عائلته تفرج عنه، مين قال ليكي إنهم مكتفينه، وإنت مالك؟ إنت تعرفيه منين، يحضر المهرجان ورامي ابنه يرد عليكي ليه، هو إنتو صحاب؟ وهل إنت جيل الزعيم أصلا؟ إنت محسساني إنك بنت خالته".
وتابعت: "وبعدين إنتي عارفة إن كلمة لازم نقتحم الفيلا ممكن تتحاسبي عليها قانونا، إنت بتعملي دعوة لاقتحام منزل الزعيم عادل إمام؟ إنت فاكرة نفسك رايحة تقتحمي عشة فراخ؟ أنا دلوقتي بعمل فيكي بلاغ إنك بتقولي نروح نقتحم الفيلا، دي دعوة غير قانونية بالمرة".
وأكملت: "وبعدين عرفتي منين إن في ناس اقتحموا بيته وعملوا له مفاجأة، أنتي تعرفي هما إيه بالنسبة له؟ إنت بتتكلمي عن الفنانة يسرا والفنانة لبلبة عشرة عمره وأصدقاؤه، إنت حاشرة نفسك ليه وإنت مش في نفس المكانة".
واختتمت بسمة وهبة قائلة: "هذا الكلام مينفعش ينزل في حق الزعيم، الفنان عادل إمام له مكانة كبيرة في العالم العربي كله مش في مصر بس".